भंडारा जिल्हा देखरेख संघाच्या उपाध्यक्षपदी होमराज कापगते अविरोध

दै. लोकजन वृत्तसेवा भंडारा :- भंडारा जिल्हा देखरेख संघाअंतर्गत ३६४ सेवा सहकारी संस्था कार्यरत आहेत. या संस्थांवर देखरेख ठेवण्याची जबाबदारी जिल्हा देखरेख संघाची आहे. जिल्हा मध्यवर्ती बँकेचे अध्यक्ष सुनील फुंडे यांच्या नेतृत्वाखाली सोमवार १० मार्च रोजी जिल्हा देखरेख संघाच्या उपाध्यक्षपदाची निवडणूक अविरोध पार पडली. होमराज कापगते यांची दुसऱ्यांदा उपाध्यक्षपदावर निवड झाली. यावेळी संस्थेचे पदसिध्द अध्यक्ष सुनील फुंडे यांनी सांगितले की, भविष्यात सहकारी संस्थांना बळकटी देण्यासाठी आणि शेतकक्तयांना वेळेवर कर्ज देण्यासाठी भरीव कामे केली जातील. सुनील फुंडे म्हणाले की, देखरेख संघाची भूमिका शेतकऱ्यांना वेळेवर कर्ज देणे आणि वेळेवर कर्ज परत घेणे आहे.

जर काही ठिकाणी अनियमितता निर्माण झाली तर त्यावर नियंत्रण ठेवण्याची जबाबदारी भंडारा जिल्हा देखरेखसंघाची आहे. जिल्हा देखरेख संघाची निवडणूक मागीलवेळीसुद्धा बिनविरोध झाली. यावेळीही काहींनी अर्ज दाखल केले होते. परंतु सर्व तालुक्यातील संस्थांच्या पदाधिकाऱ्यांशी चर्चा केल्यानंतर त्यांनी शब्दाचा मान राखत निवडणूक बिनविरोध घेण्याचा निर्णय घेतला. सुनील फुंडे यांनी पुढे नमूद केले की, भंडारा जिल्हा बँकेचा अध्यक्ष असल्याने, मी देखरेख संघाचा पदसिद्ध अध्यक्ष आहे.

जिल्हा देखरेख संघात संचालकांपैकी एक उपाध्यक्ष राहतो. त्यानुसार होमराज कापगते हे दुसक्तयांदा भंडारा जिल्हा देखरेख संघाचे उपाध्यक्ष झाले. सेवा सहकारी संस्था मजबूत करण्यासाठी आणि शेतकऱ्यांना न्याय देण्याची भूमिका राहिल. सर्व सहकारी संस्थांकडून पीक कर्ज, ट्रॅक्टर कर्ज आणि आधुनिक उपकरणे खरेदीसाठी जिल्हा बँकेमार्फत कर्ज दिले जाईल. जिल्हा देखरेख संघ अधिक मजबूत व्हावा यासाठी केंद्र आणि राज्य सरकार सेवा सहकारी संस्थेची आर्थिक स्थिती बदलण्यासाठी काम करत आहे. या माध्यमातून भंडारा जिल्हा देखरेख संघाला चांगले दिवस येतील. सध्या ३६४ संस्थांसाठी ३६ कर्मचारी काम पाहत आहेत, असेही सुनील फुंडे यांनी सांगितले. यावेळी जिल्हा बँकेचे उपाध्यक्ष सदाशिव वलथरे, जिल्हा देखरेख संघाचे नवनियुक्त संचालक उपस्थित होते.