विशाल डेकाटे यांना रेल्वे मंत्री अश्विनी वैष्णवच्या हस्ते रेल सेवा पुरस्कार

दै. लोकजन वुत्तसेवा मोहाडी ः- तालुक्यातील सर्वात मोठी ग्रामपंचायत असलेल्या वरठी येथील नेहरू वार्ड निवासी रवी कुमार डेकाटे यांचा मुलगा विशाल डेकाटे यांचा नुकताच रेल्वे मंत्री अश्विनी वैष्णव यांच्या हस्ते रेल सेवा पुरस्कार प्रदान करण्यात आला. विशाल डेकाटे यांनी आपल्या निरोजनबद्ध, कर्तव्यदक्ष कार्यप्रणालीतून रेल्वेचे तब्बल ४ लक्ष ८६ हजार १८० विद्युत युनिट वाचविले. विशाल डेकाटे यांनी केलेल्या उल्लेखनीय कार्याची रेल्वे विभागातच नव्हे तर सर्वत्र प्रशंसा होत आहे. त्यांच्या ह्या उल्लेखनीय कार्याची दखल घेऊन केंद्रीय रेल्वेमंत्री अश्विनी वैष्णव यांनी नुकताच त्यांचा भारत मंडपम, नवी दिल्ली येथे विशिष्ठ रेल सेवा पुरस्कार देऊन सन्मानित केला आहे. यावेळी रेल्वे अनेक वरिष्ठ अधिकारी उपस्थित होते.

विशाल डेकाटे हे उत्तर रेल्वे विभागात, नवी दिल्ली येथे रेल भवनात, वरिष्ठ खंड अभियंता या पदावर कार्यरत आहेत. त्यांनी २०२३-२०२४ या कालावधीत विद्युत कर्मचाऱ्यांना विद्युत वाचविण्याबाबत विशेष प्रशिक्षण दिले. कर्मचारीने दिलेल्या प्रशिक्षणाचे अनुकरण केल्याने रेल्वेचे तब्बल ४ लक्ष ८६ हजार १८० विद्युत युनिट वाचविले. यातून रेल्वेचे तब्बल ४१ लक्ष ३२हजार ५३० रुपयाची बचत झाली. आई व वडील रवीकुमार डेकाटे यांच्या संस्कारात व मार्गदर्शनात वाढलेले विशाल डेकाटे हे सुरुवातीपासून हुशार व्यक्तिमत्व होते. यांनी आपले प्राथमिक शिक्षण अरविंद विद्यालय बघेडा येथे पूर्ण केले. यानंतर उच्च शिक्षणासाठी त्यांनी कोल्हापूर येथे परिश्रम घेतले. विशाल डेकाटे यांना यापूर्वीही विविध उल्लेखनिय कार्यासाठी पुरस्कार मिळाले आहेत. विशाल डेकाटे यांनी केलेल्या कार्याच्या सर्वत्र गुणगौरव होत असून त्यांच्यावर व संपूर्ण परिवरावर सर्व स्तरावरून शुभेच्छाचा वर्षाव होत आहेत.